الفاتح جبرا وجهار لكشف كل المعادن

بعد أن قرر (الحسين) أن ينهى إغترابه الطويل الذى إمتد لسنوات عقد العزم على شراء حافلة موديل السنة كمشروع يضمن له مستقبلاً آمناً خاصة وأن خط سيره سوف يكون (مضمون) إذ أنه سوف يعمل فى نقل المواطنين من القرية التى يسكنها وإلى المدينة وبالعكس .
اشترى (الحسين) الحافلة من (الوكالة) واتجه بها نحو الميناء (صحبت راكب) حيث وصل إلى (بورتسودان) وبعد أيام قضاها فى دفع الجمارك والرسوم إمتطاها قاصداً قريته بعد أن قام بالتأكد من أن (كراتين) الملابس والهدايا التى حملها بداخلها فى مكانها وتمام التمام .
لاحظ (الحسين) عند دخوله إلى الحى أن أحداً من الشباب لم يكن فى إستقباله على الرغم من أنه كان يتحدث بالتلفون مع شقيقته (نجاة) قبل تحركه من جدة بقليل :
- يا بت الرجال ديل فاتوا وين
- أجى يال الحسين يا خوى إنتا ماك عارف ؟
- (وهو مهجوم) : عارف شنو ؟ المات منو..؟
- مافى زولن مات لكن الناس دى مشت تجيب (الدهب)
- (فى إستغراش) : الدهب ؟ دهب شنو كمان البيجيبوهو !
- الدهب الواااحد ده يا الحسين
بعد أن قام (الحسين) بالسلام على والدته وبقية أخواته ووزع عليهم الهدايا التى أحضرها لهم نام من أثر الرحلة الطويلة المضنية ولم يستيقظ إلا مع آذان الفجر ، توضأ وإنطلق نحو (الجامع) لأداء صلاة الصبح ولكن مفاجأته كانت كبيرة عندما وجد المسجد خالياً إلا من الإمام (ونفرين) من عواجيز الحى الذين خاطبهم بعد إنقضاء الصلاة
- يا جماعة الناس دى مشت وين؟
- الناس دى كووولها مشت تجيب الدهب !
فى العصرية تجمع أعمام وأخوال (الحسين) أمام صالون المنزل وهم يهنئونه على سلامة الوصول ويسألونه عن أحواله وأحوال أبناء الحى الذين كانوا معه فى الغربة
- أها الحسين الناس ديل هناك ما مبسوطين ومرتباتهم سمحة
- والله يا عم عثمان المرتبات هناك بقت شوية وما بتعمل حاجة
هنا (ينط) الطيب ودالفكى :
- هسه ما أحسن ليهم لو مشوا (حتات) بجيبو الدهب دى؟ محجوب ود أمونة (الهيليفيت) ده خلى الشغل و(باع) الكنتين وأشترالو الجهاز البفتشوبو (الدهب) ده عليك أمان الله ما عدى ليهو أسبوعين إلا جاب ليهو تلاتا كيلو باعم وهسه راكبلو (بوكسى هايلوكسى) وعرس داك يا العرس !
اختمرت فى راس الحسين (قصة الدهب دى) ولما لم يكن معه غير (الحافلة) فقد قرر أن يقوم ببيعها أو مقايضتها (بجهاز) كشف، بحث عن (محجوب ود أمونة) حتى وجده فى مكان (البنشر) الذى قام بافتتاحه
وهو يقوم بغسيل (البوكسى الهايلوكسى) وقد إنطلقت منه أحدى الأغنيات الشبابية
- والله يا الحسين أنا (الجهاز) أشتريتو من جماعتن لينا بيجيبوهن من بره بى (أربعين مليون) جهاز يابانى مية المية وأكان عايز الصينى بتلقاهو رخيص !
- لا بس أنا عاوز اليابانى ده !
قام الحسين بمقايضة (الحافلة) بالجهاز وتبقى له شوية قريشات كانت كافية للتكفل بنفقات رحلته مكان (البحث عن الذهب) ، ظل (الحسين) ولأسابيع طوال يحمل الجهاز حول كتفه ويمسك بعصا الإستكشاف بيمينه مما (تشرق الشمس) وحتى تغرب لمستقر لها وهو يمنى النفس بالإستماع إلى تلك (النغمة) التى أخبره عنها (محجوب ود أمونة) والتى تصدر من الجهاز حين عثوره على ذهب (تحت الواطة) ، بدأ اليأس يدب قلبه حتى ذلك اليوم الذى إقترب فيه (الحسين) من أحد الصخور فإذا بالجهاز يطلق صوتاً كصوت الإنذار ، أخذ (الحسن) ينطط كالمجنون حتى تجمع حوله بعض ممن كانوا يبحثون مثله بالقرب من ذات المكان، أنزل (الحسين) الجهاز من كتفه وبدأ فى الحفر .. الحفر ... الحفر حتى بدأ جسم أحمر اللون مائل إلى (السواد) فى الظهور ، ما أن أخرجه (الحسين) بسرعة ولهفة من (الحفرة) حتى سمع صوت أحدهم يخاطبه قائلاً :
- الشئ ده (نحاس) مو (دهب) يا اللخو
- نحاس كيفن يا جماعة والجهاز قعد يكورك
- (وهو يمسك بجهاز الكشف) : جهازك ده يا اللخو (جهاز كشف معادن عااامة) .. أها أقرأ هنا - وهو يشير إلى ديباجه على الجهاز - بيقول ليكا (فور أوول ميتالز ) يعنى (لكل المعادن) !!
كسرة :
هذا المقال كانت مناسبته حضورى لإحدى المناسبات فى تلك القرية عند مرور عربة (كارو) ذات لوحة كتب عليها بخط أنيق (فور أوول ميتالز) كان يقودها شخص عرفت فيما بعد أنه (الحسين) !

الاستاذ الفاتح مع احترامى الشديد لك واعجابىدائما وابدا بكتابتك وطريقة تناولك للمواضيع كنت اتمنى ان تتناول الموضوع بشكل اخر وهو ان هذا رزق فتحه اللة سبحانة وتعالى لناس الغلابة بعد ان طاقت بهم السبل ومالاقين مخرج وصدقنى يا استاذ فى ناس بجد اللة رزقم.

--------------------------------------------------------------------------------

2/ بشرى مبارك إدريس - (بيريطانيا( بيرمنجهام)) - 7/2/2010
يا جبرا سلام عليك وكيف حالك لكن كدى قبال ماندخل فى موضوع الدهب نسألك من موضوع الكلاب وأنت من ندوة لى ندوه والله قربنا نسميك الفاتح كلاب على وزن عبدالباقى كلاب!! ولكن عملت الحكاية دهب وقالوا الكلاب ليها علاقة بالدهب وأصلوا كانت الكلاب دى حارسة الدهب ولكن لما شافت الملايين الداخلة مرقت بى كرعينة !!ومن الجوع بدت تأكل فى الاطفال !! نرجع لموضوع الدهب والليلة بموضوعك ده أكون وصلت الموضوع رقم 50 فى سلسلة كتاباتى فى المنتديات عن الدهب وأنا دهبى عايز أعملو كتاب يوثق كل الحاصل وحقك وحق الدكتور عبدالجليل قسم السيد من منتدى السروراب محفوظ كلما أكتب أو أنقل موضوع يقول لى يا بشرى إنت الايام دى (مفلس )؟؟ لكن رسلت ليهو فى الخاص والعام بما عندى فى الجيب والبنك وما وعدته من خير ودهب بعد إصدار الكتاب وبدأ يكتب بعد أن ألحت عليه المدام قالت ليهو والله ود الجودلية ده ما بظلمك حقك محفوظ وكذلك حق الاستاذ جبرا وبدون جهاز وما عندنا لا حافله ولا 50 مليون !!وعلى العموم أنا بجى قريب وبس بمشى محل الدهب وأنزل فى العبيدية النفافير منزل صديقى زين العابدين حسن الزبير(منزل الاسرة ) وأعمل مركز إعلامى خاص بالدهب .

--------------------------------------------------------------------------------

3/ أحمد عبد الباري - (السعودية) - 7/2/2010
عندما يكون الاقتصاد هشاً يستنسخ المغتربون ظواهر فقاعية يقال أنها تدر دخلا لكنها ما تلبث أن تخبو كفقاعة صابون. بقالة حديثة، جزارة حديثة، معصرة زيت، حافلة سيفليان،دفار، جامبو، زد واي، كي واي، أراضي شعبية، تركيب عطور، كابينة هاتف، محل جوالات، وأخيرا جهاز كشف الذهب. يظل المغترب هكذا يجرب ما جربته الأرضة وهو الحجر ثم يتركه وهكذا دواليك والسبب الاقتصاد الهش القائم على أرجل كسيحة. أعرف شخصا أصر على أخيه المغترب أن يشترى له معصرة زيت لأنها كانت (موضة). تم شراء المعصرة. بعد فترة أقنعه الأصدقاء أن سعر الزيت رخيص لذا عليه أن يسبتدلها بأبقار. باعها بأقل من الثمن واشترى أبقار. قال له الأصدقاء هذه الأبقار ضعيفة والسنة (قوية) لذا يجب أرجاعها لصاحبها. ذهب لإرجاعها وجد أن صاحبها بالسجب لأن الأبقار كانت مسروقة!! قال له أهل البائع يمكننا اعطائك بعض الضأن مقابل هذه الأبقار أما أذا أردت طريق القانون فهذه مصيبة لك وله. قبل بالعرض. كانت (الضانايات) ضعيفات جدا فأصبحن ينفقن ويلقين حتفهن واحدة بعد الأخرى. ولما انتهت اجازة المغترب لم تبق لأخية غير (ضاناية) واحدة يتصبب المخاط من أنفها.

--------------------------------------------------------------------------------

4/ مها عبد الرحيم - (المركز الفومي للبحوث) - 7/2/2010
مسكين الحسين ضيع حصاد عمرة هو ماعارف انو الطمع ودر ما جمع اه الطمع خلاهو من حافلة يسوق كارو

--------------------------------------------------------------------------------

5/ محجوب - (السودان ) - 7/2/2010
الاخ جبرة السلام عليكم أجمل حاجة فيك انك متابع المصايب الحاصله كلها لاكييين والله ناس الدهب ديل حيرونا عديل اى واحد يقول ليك فلان لقى ليه سبعه كيلو وواحدين بيختشو شويه بيقولو لقى ليه كيلو . لكن الحقيقه قالها لى واحد عنده جهاز وهى المختصر المفيد ( انو والله الدهب اى زول عنده مصدر رزق غيره مابيرجع الخلاء ) لانك لو شفت الطريقه و العيشه غاتو تدى ربك العجب !!!!! نمشى ونجى نقول كلو ده من الضائقه الاقتصاديه والله يجازى اللى كان السبب......

--------------------------------------------------------------------------------

6/ احمد حميدة - (السعودية الطائف ) - 7/2/2010
الله يجبر خاطرك يااستاذ جبرة اول مره افهم المثل الذى يقول شر البلية مايضحك

--------------------------------------------------------------------------------

7/ صابر على الجمر - (الخرطوم ) - 7/2/2010
صدق اللي يقول عن السودانين كسالى عايزين يغنوا بين يوم وليلة ما عندنا الأرض دي لو زرعناها ساكت بنجيب دهب لا محتاجة لري ولا تمهيد ولا حاجة ترش البذر والمطر تجي تسقيه ما عليك إلا الحصاد

--------------------------------------------------------------------------------

8/ فاروق نوري - (الخرطوم ) - 7/2/2010
يقال والعهدة على الراوي أن الحكومة هي اللي طلعت شائعة الذهب هذه علشان اذا صدق وطلع المواطن دهب تفرض عليه ضريبة انتاج وزكاة الدهب

--------------------------------------------------------------------------------

9/ سامي سعيد - (السكوت - الشمالية ) - 7/2/2010
هذه سمة الكسالى البحث عن وسيلة سهلة للغنى أليس لدينا الأرض والماء والمناخ اليس هذا اغلى من أي كنز أي بلد تجتمع فيه العناصر هذه ويعاني كل هذه المعاناة مشكلتنا مشكلة إدارية لا نملك إدارة تستغل كل هذه الامكانيات لصالح المواطن.

--------------------------------------------------------------------------------

10/ عبدالرحمن أحمد المهيدي - (السعودية) - 7/2/2010
طيب كويس الحسين طلع ليه بي كارو ، مش زي صاحبنا ود السر وإليك حكايته : كان ود السر مستور الحال في السودان ياكل ويربي ويعلم في عيالو . طلعت في راسو لازم يغترب اشترى فيزا للسفر للسعودية . ويوم وصوله يحتفل به أصحابه ودار ت بينهم الونسة وكل واحد في الشلة يعبر عما بنفسه ، فمن يقول ما عايز من الغربة غير بقالة وآخر يقول ما عاوز غير محل اتصالات وآخر يقول ما عاوز غير كافتيريا وآخر واحد قال ما عاوز من الغربة غير حافلة : وسألوه وانت يا ود السر عايز شنو؟ قال أنا والله اتمقبلت جنس مقلب في الدنيا دي أنا البقت علي خلوها ساكت !! . سألوه كيف ؟ قال كان عندي حافلة بعتها اشتريت بثمنها الفيزا وجيت .

--------------------------------------------------------------------------------

11/ نورالدين احمد بدر - (حلفا الجديدة) - 7/2/2010
شكرا استاذنا جبرا ,,,شكرا ايها الرائع الانيق ... لكن الجمعة الفاتت دى غشيتنا باقى لى انت كمان بقيت تبعهم !!!! يا اخى نحن بننتظر الجمعة بفارق البر علشان نقرا سيناريوهات جبرا تقوم تجلينا ..!!! رجاءا رجاءا اى شى ولا سيناريوهات الجمعة شكرا

» الفاتح جبرا : لف ودوران
» الفاتح جبرا :- عكس الهوا ...!
» الفاتح جبرا : البدايه كدا ...!
» الفاتح جبرا وكنايات عامية
» الفاتح جبرا : أمثال .... ولكن