انا بكرهكــــــ !!!

هذه القصيدة التى نحن بصدد قراءتها للرائعة نضال حسن الحاج
تلك الانثى الجميلة والبسيطة فى الشكل والكلمات والتى تنتقى مفرداتها
وبعناية من العامية السودانية البسيطه وتشكل بها لوحه فريدة يطرب
لها كل سامع لما تحويه من تشبيهات وكنايات واستعارات بديعه
وانا شخصياً من المعجبين بهذه الفتاه الجديده فى طلتها وفى معنى
مفرداتها وحاولت ان اتحصل على بعض ماكتبت فلم اجد سوى
قصيدتين او ثلاث هذه احداها وبعض مقاطع الفيديو انشاء الله اتمكن
من تنزيلها فيما بعد:[/size][/color]

انا بكرهك للشاعرة نضال حسن الحاج
________________________________________
انا بكرهك
بس بكرهك
انا بكره اليوم الصنع قلبا يكورك ويندهك
انا بكره الوطن البلم شرف الغرام المنتهك
من ياتو باب طليت علي ما كنت اصلا بشبهك
انا بكرهك
انا شلت ريدك في القليب وسقيتو من دم العروق
صنقعت دليت النجم دنقرت كبيت نور وشوق
وعصرت موية الانتظار ختيتا في وجع الحروق
وكان النتيجة تبيع هوي هو اريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام كان امنيات قلبو الرجوع
من وين اذا هتك الضلام حيل خيلي القالك شموع
لكني مجبور اطردك واقفل وراك باب الضلوع
شديت رحالاتي ومشيت وكتين هتك حيلك هواي
ارتحت في موجي ورسيت
لا حرك الموج البحر
لا صد فلبي ولا قسيت لكن طلعت خيال عشم
ضمخ رؤى الوجع المميت
انا بكرهك
قدر اشتهاي
انا بكرهك
قدر الغرام الكان زمان كابت مساماتي وهواي
انا بكرهك
قدر اني ما لودت بيك كريات شراييني ودماي
انا بكرهك
قدر اني غنيتك غناي
من وين دخلت علي مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك علي
كانت سماي مليانة غيم
فتق جراحــاتي
فتق جراحاتي وامش
خليني في لهب الجحيم
انا قلت ليك..
انا بكرهك
قدر المواسم الشادة خيل الريد عليك
انا بكرهك
قدر المصائب الحارسة بوابات مجيك
انا بكرهك
نفس المساحة وحجم قلبي الكان تملي بيشتهيك
بقى بكرهك
واتوكل ارحل مني فوت
حرمان علي قلبي الكلام
كان غيرك اجتاحو السكوت
خليهو قلبي الاندفن
تنسج عليه العنكبوت
اوخلي.... من بعدك يموت
الموت اخير......
من اني افضل
في رحابك وفي رجاك
انا كنت لو غاب القمر دائما بضوي
ضلام دناك
وانا كنت لو غيمك رحل
بطلع عشان اسكن سماك
وانا كنت لو بردك نزل
بوقد صوابعي لهب حداك
لكن منو القدر كدا
والله لو انا في محلك
بنسج الشمس احترام
واهديها ليك متمددة
بفتح كراريس الكلام
اختار حروفي واجردا
بنبش قبور المستحيل
كلمات شكر متفردا
لكن خسارة على قلب
حباك بلا ما يعرفك
انعل ابو القلم العلي دفتر غناك دمو انسفك
انعل ابو الشعر الغشاني وغنى فيك والفك
منعول غناي
منعول غناي كان ما امتطيت خيلي وبقيت اتاسفك
بتاسفك وكتين عيوني بسوقن الشوق لي انتظارك
لما ليلي يسوق محاسنو وينهزم عندك نهارك
لما ابكي انهزامي عشان ابارك انتصارك
لما كوكبي ساب مدارو رحل عشان يسكن مدارك
كنت مالي زمان ومالك
لكن وحاتك بكرهك
ندمان
ندمان على عمرا معاك ضيعتو
ضيعتو في غفلة زمن
ندمان علي
دمعا سكبتو على رضاك بلا تمن
انا كنت بحلم في وجودك ينكسر خاطر الشجن
لكن رضاي عليك عشم ابليس قصاد جنة عدن
انا بكرهك
كلما يطول ليلي ويواتيه العذاب
انا بكرهك
كل ما القلم يركب مصاعب الدنيا
يمشي على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق
تتوضأ موية الانتحاب
انا بكرهك
من كل باب انا بكرهك
واتوكل ارحل من جواي
غلطان اذا قلبك هداك قال ليك حا تفضل غناي
غلطان اذا عقلك رضخ لي ظن يقول انك حداي
والله ما فارق معاي
انا كنت ناوي اجملك
بس كنت ناوي اجملك
وامسك مضامين اللغات
من فيض حروفي اكملك
ترحل علي درب العشم
بي زاد هواي احملك
وكتين اخش قلبك جرا
واقطع قليبي وادملك
ندمان منو
انا غايتو ما ندمان عليك
اتوكل ارحل من جواي عيش العذاب الباقي فيك
ولو قلبك اتجرأ رجع
حقك تلومو علي مجيك
شان قلبي انت مليتو دم
ياخ فلبي انت مليتو دم
ما عادلو باقي يسبو ليك
على كل حال
انا بكرهك
عدد الحصى وعدد الرمال
انا بكرهك
عدد الصواب والاحتمال
انا بكرهك
عدد الحقائق والخيال
انا بكرهك
عد الشنة وعدد الجمال
انا بكرهك
عدد الاجابات والسؤال
انا ابكرهك
عدد الشعر ماسنة سيف الارتجال
انا بكرهك
عدد اللي ممكن والمحال
انا بكرهك
عد ما زمان قت ليك تعال
انا بكرهك

مستورة حالي وراك وفوت
يا دابو ليلك همو طال
مستورة حالي وراك وفوت
يا دابو ليلك همو طال
عاى كل حال
انا بكرهك
ا (يااخونا الراجل ده مااتلوم مع البت دى شديد)

والله من هيثم دا جا
انا بقيت لافى صينيه ، اول كنت بلقى ردود وحركات وبركات
لكن اسع شكلنا انسحب مننا الكفر وفكت
الله يكضب الشينه
لكم ودى جميعاً.

وأنا أرد عليك وأقول ليك واصل وأنت قلّ من يكرهك بس أنا مشيت أصلى الظهر وأجيب معاى الغداء من (المطبخ ) الباكستانى زى مابقولوا ناس السعودية ما تتفضل معاى شيش كباب كارب . وإنت يا أشرف براك تقلّب فى المحن إنت ما قلت الشواكيش دى خلونا منها وكت جبتها براك أبقى دق صدرك سوف نملأ ييها ( أبوسباع ) والله أنا ما عارف أبو سباع دى شنو لكن كان يستعمله صديقنا بتاع العبيدية ويكون أسع ملأ من الدهب (أبوسباع وسباع ذاتو) وإن شاء أشرف يفوتو كمان .حقو تكتب إسمو إمكن الظروف توديك العبيدية (زين العابدين حسن الزبير فى النفافير ) وفى المحطة محل ينزلك القطر أختو مدينة حسن الزبير وتلقى فى (الفضية ) بتاعتم صورة فيها الزين وناصر ود الكباشى وعبدالعظيم الهادى وعبدالله الطيب وشخصى الضعيف وما بتعرفنى لا زمان ولا أسع زمان كنت صغيرونى وقيافة وشعرى ماشاء الله أصلو ما بتقول الراجل العجوز وشايب وشين ده ياهو بشرى الفى الصورة !!ولكن هذه هى الايام يوم ليك وأخر العمر كلو عليك .