شاكوش محترم

وكتها كنت طالع في الكفر وعامل فيها مافي إتنين مني في الزايله يعني كنت مخموم في نفسي
جيت للبلد في إجازت العيد وطبعا العيد الكبير في بربر ليهو طعم خاص وبما إني جاي من العاصمه تقريبا والمفروض إني مفتح اكتر من غيري .المهم في الامر وصلت للبلد ولقيت كل الشباب بتكلمو عن بت واحده وعن جماله ،وكيف إنها مفتريه ومافي زول قادر يتكلم معاها، وطبعا العبد لله عاجباهو نفسو جدا. طولته لساني علي الشباب وقلت ليهم مش البت المجنناكم دي وعمله الكوم بجنيه دي انا ممكن بكلمتين اخليها تدق الدلجه وتحلف براسي . واخليها ليكم تجري وراي جري(ماود العاصمه)وطبعا إتبجحة وطولت لساني جدا وماكنت قايل(حواء والده)
وطبعا كان لازم أسبت للشباب إني عند كلمتي وإني قادر علي البنيه وسعيت لمقابلته بشتا السبل ونسبتا لصعوبة شوفته بالعافيه وباخوي واخوك شفتها في الشارع وعلي طول خشيت في الموضوع بالطول وحكيت ليها عن حبي الاكيد وشوقي الشديد. وعن حاجات تانيه حامياني...لكن الحصل ماكان في الحسبان البنيه عارفه إنها جميله والعبد لله كان متوقع إنو مجرد مايشرح ليها المشروع حتوافق علي طول .لكن بت الناس قالت:
مني:طيب انا سمعتك وانا هسي مستعجله لكن اديني فرصه افكر.
هيثم:ده الماعملته حسابو
مني:قلت شنو؟
هيثم:لالالا ماقلت حاجه.....لكن الموضوع مامحتاج تفكير
مني: بإصرار:كيف يعني مامحتاج تفكير ؟لاياخوي محتاج ونص
هيثم: طيب بتردي لي متين؟ وكيف؟ ووين؟وإنت شوفتك صعبه جدا
مني:يومين تلاته ولوما قابلتك بكلم ليك احمد بتاع الدكان
ملحوظه(احمد بتاع الدكان ده واحد من الشله لكن بتاع شمارات وشيال حال واسرع من قناة الجزيره في الاخبار وغير ده لكو لو عرف الموضوع حيشمة بصوره كبير يعني بالإنجليزي كدهxxL)
هيثم:لالالالالالا عليك الله كلو ولا احمد
مني: والله خليني اشوف لكن انا شايفه احمد اقرب زول
هيثم: طيب إذا كان ولابد من (اقشر) ده يبقي مافي داعي يعرف أي شئ عن الموضوع
مني :كيف يعني مايعرف شئ عن الموضوع؟طيب اكلمو كيف؟
هيثم. والفار بداء يلعب (مع وليداتو)اقصد في عبو:اسمعي يابت الناس إذا كنت موافقه أمشي لي احمد واديهو أي حاجه قولي ليهو أديها للعبد لله.
مني:حاجه زي شنو يعني ؟
هيثم: ياخي أي حاجه .إنشاء الله ورقه فاضيه
مني: طيب ولو كنت ماموافقه؟
هيثم: ليه في إحتمال إنك ماتوافقي؟
مني:والله كلو شئ ممكن
هيثم:والله دا كلام غريب علي كل حال إذا إذا كنت ماموافقه لاتمشى لي اقشر ولاتجيبي ليهو أي سيره عن الكلام ده.وانا بمشى ليهو بعد تلاته يوم زي ماقلتي وبسالو إذا في زول ساب ليه حاجه عندو معناها OKوإذا مالقيت عندو ائ شئ معناها الموضوع إنتهي ومافي زول يعرف عنو أي شئ.
لكن وين مابتدي حريف البت في نفس اليوم المساء مشت لي احمد بتاع الدكان وقالت ليهو
مني:إزيك ياحمد......... صاحبك وين
احمد:اهلااااااااااااااين يانوارة حينا...... صاحبي منو؟
مني: صاحبك الجاي من الخرطوم وعامل فيها جاي من موسكو
احمد:اااااااه ده (هيثم)مالو ؟اوعي يكون غلط معاك د مانا عارفو سليط
مني:لالاماغلط معاي بس عليك الله ياحمد لو شفتو قوليهو مافي ليك ورقه
ملحوظه(طبعا نحن مإتفقنا علي كده .لكن لازم تحرر سوقه الاصل حار وتوري كيف كل الشباب مكسرين فيها)
احمد: ورقة شنو؟؟؟؟؟؟
مني:ده موضوع بسيط كده
احمد:بسيط كيف ؟مالو معاك الراجل ده كدي تعالي كلميني
مني: عليك الله ياحمد خليني امشي بكلمك مره تانيه...بعدين صاحبك ده زاتو قال مايكلموك
احمد(الشمارحارقو):لالالالالاوالله ده شكلو عامل مصيبه كبيره لازم تكلميني بيها عشان نادبو ليك ونحاكمو كمان
مني:ياحمد انا بكلمك لكن ماتقول مني كلمتني وخلي الموضوع ده بينا طيب
احمد:ياخي الكلام ده عيب منك .معقوله بس انا اطلع كلام منك إنتي إنشاء تجيني ملاريا لو عملته كدا إعتبري نفسك ماكلمتيني وختي في بطنك عجوره صيفي بالعدم خيارتين
مني:صاحبك لاقني وعمل لي فيها حبيب زي شلتو المبهدله دي ...هوقايلني فايقه ليهو
احمد(بكل شماته):لالاوالله غلطان وزي مابقول حلم الجيعان عيش (من القوصي)
مني: وكمان قال لي لو موافقه ختي لي ورقه عند احمد
احمد: وهسي مافي ليهو أي وريقه والله مسكين(يستاهل)
مني ايوه ماعندي ليهو ورقه
احمد:لاإطمني سرك في بير عمقها راجلين ومره وشافعين زياده (مع إنها مابتخارج معانا)
وبعد الحديث المسير للشفقه تطلع مني من الدكان وبعد اقل من خمسه دقايق يدخل علي احمد المرحوم عبد المنعم عبد النصيح عليه رحمة الله
عبد المنعم: إزيك يابو حميد
احمد: حيد منو وزعيط منو ....الليله ماشفته صاحبك عمل شنو؟
عبد المنعم:صاحبي منو؟؟؟إنشاء الله خير
احمد:صاحبك بتاع السقاي العامل فيها اميتاب باتشان
عبد المنعم: منو هيثم؟ مالو عمل شنو؟
احمد: والله دي عمل عمليه ماعمله زول قبلو...تصدق صاحبك الزي ابو دردوق ده قال داير يعرس القمره
عبد المنعم:القمره منو ؟اوعك تقول لي مني؟؟؟؟؟؟
احمد ايوه مني....شفتا كيف صاحبك شطاح... هو مني دى نحنا الحلوين ديل ماعاجبنها يجي يعجبه صاحبك الما معروف ماشى ولا جاي ده .والله ادهو ليك شاكوش خلوه لافي صينيه.
عبد المنعم:كدي احكي ليه القصه من اوله لي اخره
احمد:يحكي القصه كلها لي عبد المنعم نقنقنقنقنقنقنقنققنقنقنقنقننقنقنقنق وبعد ده كلو قالو ليهو مافي ليك ورق
عبد المنعم:طيب إنت كلمتو ولا لسه؟
احمد:لا لسه ماكلمتو
عبد المنعم: طيب خلاص ماتكلمو واديني ورقه فاضيه انا بكتب ليهو فيها كلام وقوليهو ختته ليك مني هنا
وبالفعل وصلتني ورقه صغيره مكتوب عليه
ورقة شنو الدايرني ليك ارسله؟
بتحبني ام ناوي ياخوي تعمله؟؟
اصلك مشوكش وعندي ليك معادله
بس خليفه ماتقدر عليها تحلله
وانا جاهله لسه ومادرسة المسأله
وبعد إنتظار صدقني برضو جوابي.............لا