ياسمحه لا

عدد المساهمات : 41 تاريخ التسجيل : 28/10/2009

ياحلوه لا ياسمحه لا سيبي الغرور والإفترا
سيبي العناد سيبي البعاد خليك زهره منوره
خلي التعاسه تفوة بعيد نحن السعاده بنشتله
نسقيها من ريدن الحنان نرويها من مويتو الحلا
نرعاها بالود والسماح نحميهاها نبدا ندلله
نحميها من جور الزمن وبالريده ديمه نغازله
ونخلي درب الحب سماح ونزيل صعابو نزلله
ونفرش دروب الريد رمال وبالورد ديمه نجمله
وتبدا الشمس ترسل شعاع انواره زاهيه مسطره
خيوطه من عسجد اصيل في الريد جزورو ماصله
محفوره في وجه النجوم في مكانه عاليه مقدره
موضوعه بين قوس حبنا سبحان ربي الصوره
خلاها زي كوكب منير فاض بالشعاع في الجو علا
بين النجوم زايد بريق في شكلو قمر منوره
باهي وجميل بيك ياجميل مالبينا أكبر من صلا
يحميك من عين الحسود (بالنازعت)و(البسمله)
ياسمح ماتسيبي العناد ماسمحه إنتي ومقدره

عدد المساهمات : 49 تاريخ التسجيل : 26/03/2009

واصل يارايع وكل يوم أرح أعصابنا بمنضومه من الدرر الجميلة أيها الرايع الاتتوقف نفس جميل في الشعر يملاء رئتنا دائماٌ فتنتعش حياتنا من جديد

والله سمح انت وعسل انت
وبركة الجيت بركة الجيت عسل انت وبسكويت

مشكور حبيبنا هيثومة وشكلك ماعايز تلبى طلبى
والقصيدة الطلبتها ماعلشانى بالمناسبة عشان الشباب
وعشان هى قصيدة رائعة بكل معنى الكلمة
لك تحياتى وللاسرة الصغيرة

يا أشرف والله ولدنا وشاعرنا هيثم دة قصايدو (زى بنات ميوينخ كل واحدة أحلى من التانية عبدالعال كان قرأ الكلام ده حايقول هلا هلا بشرى أظن الجامايكيات فى بيرمنجهام عملن ليهو وجع وش !!!!) يا عبدالعال كبرنا على (البصة واللصة ) وبقينا ناس تلاوة وحليلنا فيها !! عشان كده يا أشرف الزول خليهو من ما يطلبة المطلعون وكل شغلتو نجيضة !! أها ياهيثم دى والله أقرأ فيها زى إمتحان العقوبات فى كلية الشرطة وعلى الرغم من أن المادة صعبة ونص القاعة كانو يتلفتو ويعاينو فى بشرى ده بكتب فى شنو والله العظيم ثلاثة أنا كنت بكتب تلاتة ساعات متواصلة لم أقف فيها إلا ولعت لى سيجارة بينسون وطلبتها من الملازم أولا وقتها سيف النصر (اللواء معاش حالياً وكان فى مجلس إدارة نادى المريخ ولعب فى مريخ الابيض وحريف جداً ويلعب مهاجم وثيردباك فى آنٍ واحد !! ) وأذكر قال لى هاك السيجارة كان تجيب مريسة تام زينو !! فناولتة الكراس الاول وكان يجلس على حافة الكنبة قريب منى وبدأ يقرأ وبدون ما يشعر أخذ الكراس الثانى ويقرأ ويعاين لى وبعد ما أنتهى قال لى يا طالب الكلام ده قريتو متين وجبيتو من وين ؟؟؟ والله أنا السوابق دى عمرى ما سمعت بيها ؟؟!! وجبت فى العقوبات 90 من 100 أكبر نمرة فى الدفعة !!! ولو بعد الكلية واصلت فى الفرع كان أكون الان عندى كم دكتوارة فى القانون ولكن !!! الله يقطع الجوازات ومطار الخرطوم والسهر والسفر وكل شىء قسمة ونصيب والحمد لله راضين بما قسمة الله لنا وواصل فى أبداعاتك أخى هيثم حسن الطاهر فقد جعلت المنتدى خلية نحل !!

حياك الله جنابو بشرى والله ليك وحشة
وبمناسبة بنات المانيا ديل ياخوى ماتشوفوا لينا المانية
نحن ماعزابة وكدة . وبعدين الجماعة ديل نسابتنا
وشايلين مننا مره خلونا على الاقل نتسدى.

يا أشرف إنت أقعد سويها لى شعر ومنتديات أسع( حميدة) بت محمود الالمانى دى الجات تقرأ فى الجامعة فى السودان دى ما حال عليها الحلول ووجبت فيها الزكاة أقصد العرس !!! أنا قلت والله يطلع واحد فيكم قلبو محدثو يخت فيها حبل !! والله كاربة وشفته بى عينى وكمان محجبة ومسلمة وأبوها مسلم وفى عمر العرس (أخفس على السودان فى أجازة ومن هناك على هامبورج وماتنسى تودع السخانة وتشيل معاك بطانية كاربة والله هامبورج فيها برد !!! ) مع تحياتى وأكان داير بنات ميونيخ (الشرط ) رسل لى أخونا عبدالعال فى الخاص !! بس ما تسمع عايدة مرتو !!!!